昨日下午四点几正打紧麻将，忽然手机铃声响，接起一听，一个带浓重外地口音的男人用白话同我讲：“我依家换咗依个电话号码，你记住倨啦！”我一听就知系诈骗犯打嚟嘅电话了，因为印象中根本就无D咁嘅口音嘅朋友，我就即刻唸到要玩下倨了，就扮作好似好耐无联络嘅朋友咁问：
    “喂！喂！喂！点啊 ，最近几好丫嘛？”
    “几好，你记住我依个电话丫，我新换伽。我得闲再比电话你啦。”讲完就急急挂电话了。真好笑，我第N次接依D电话了，我知倨第二日一定会再打电话比我个嘅，跟住将倨个电话（13763316929）打上骗子二个字储存住。
      14号上午11点二十分，果然骗子比电话我了，哈哈！反正得闲无咩事，就同倨玩下啦。接起电话唔等倨出声就好主动讲：
      “点啊！”
      “唉，有D事想麻烦你。”
      “无所谓啦，咩嘢事啊？”
      “琴晚同D朋友在花都食饭，食完D朋友话去卡拉OK玩，玩完后叫咗几条女去开房，哎！点知比差佬捉咗。”
       我唸，入正题了，肯定系话要罚钱，倨自己唔够钱叫我汇钱了。我就先唔比倨讲嘢住，就问倨：
      “边个派出所啊？”
      “江高。”死蠢人，连花都同白云都未搞清就出嚟搵食了，可悲啊！
      “江高？江高唔系白云区咩。”倨一听，就犹豫咗一下，我即刻就话：“我帮你搵下睇下有无熟人。”倨可能估唔到我会咁讲，咦咦昂昂咗一阵就话:“咁唔该你先了。”就挂机了。过咗十几分钟，电话又响，一睇，又系倨。唉！依条友仲唔死心，咁都仲打嚟 ，真系意为撞到条水鱼呀......       “依家咁啊，D差佬比我打电话，话唔拉人了，罚钱就放人。如果拘留要十几日啊。”
      倨接住话：“拉咗比屋企人知道就麻烦了，我朋友道又唔够钱，差几千文。唔好意思啊，想叫你帮下我。”我好好爽咁一口就应承倨了 。
      “无问题，你将个开户银行号码同人名比我啦。”我估倨唸，水鱼上钩了（哈哈哈！）倨就话：
      “你边个银行方便丫？”
      “我个个银行都方便，无所谓。”
      “咁好啦，我问下个朋友先，等阵再比电话你。”
      二分钟唔到，电话又嚟了：“你挪只笔记住啦。”我话：“我无笔喔，你发个信息比我啦。”倨犹豫咗一阵就话：“好啊。”一分钟唔到手机就收到i信息了----农行6228480084432516916户名李健辉。跟住电话就到了：“收到未啊？”
      “收到了。”
      “咁真系唔该晒你了。”嘿嘿，我唸倨意为肉到口了。我话：
      “唔使客气。”
      “咁你要几耐先划到嚟啊？”
      “要半个钟头左右。”
      “咁好啦。”临挂电话倨就无忘记再次讲多谢我添。
      12点刚过，电话又嚟了，“搞掂未啊？”当时，我正在公交车上，我就话“未啊，好多人。”依个时候，公交车个喇叭又刚好报站，我意为倨会听到嘅，点知倨鬼迷心窍，竟然听唔到。
      “咁仲要等几耐啊？”
      我话“好快了，仲有三个人。”
      将近一点了，都仲未见条滚友嚟电话，我朋友就话，倨应该知道我玩倨，所以唔会再打电话嚟了，我觉得都系。点知一点刚过，电话又响了，咦！唔通倨仲唔死心，挪起手机一睇，果然又系条粉肠。我喂咗一声倨就迫不及待咁问：
      “划咗未啊？”
      我就答：“搞掂啦。”倨听到后应该好兴奋吧，嘿嘿！
      “真系唔该晒你了。几多钱手续费啊？我出嚟比返你丫。”
      “唔使手续费嘅。”
      “唔使客气，一定要比返你嘅。”呵呵，倨仲好似好义气咁喔！我即刻就话“唔使手续费嘅。”
      “咁你划咗几钱啊？”
      “三千。”
      “唉！你点解划三千嘅！”哗！倨老味丫，仲怨我添？ 我就即时想拆穿倨笼嘢了，但想想，再玩下倨先，我忍。就话：
      “你话几千丫嘛，我咪划三千啰。”
      “六千啊！”倨真系意为搵到只水鱼了......X #*X      
      “咁好啦，我再划多三千过去啦。”
      放低电话我就知，游戏结束了。朋友话，倨可能会打电话嚟妈叉我，我话，再蠢嘅骗子都唔会再打电话嚟啦，系咪。偷鸡唔成啊------电话费都晒埋。      
      哈哈哈！系咪好好玩呢，直到依家都无电话嚟过了。如果下次再接到咁嘅咋骗电话，我就换过另外一种玩法玩倨......
      二点四十分，我打110 报警，不过接警嘅工作人员比我嘅感觉就有D敷衍我了......

几时介绍识下啊？